Бүгүн  Майаҕаска  Дьокуускай куоракка олорор биир дойдулаахтарбыт "Ийэ тыл" түмсүүлэрин кытары көрүстэ. "Ийэ тыл" түмсүү салайааччыта Лена Заболоцкаяны кытта биир дойдулаахтарбыт СӨ "Кэскил" оҕо издательствотын салайааччыта Ольга Семенова, Арктикатааҕы государственнай култуура уонна искусство институтун проректора Зоя Готовцева, "Чолбон" сурунаал бас эрэдээктэрин солбуйааччы Данил Макеев, Россия суруйааччыларын сойууһун чилиэнэ, суруналыыс Яна Байгожаева, норуот үөрэҕин тарҕатааччы, "Олох үөрэҕэ" норуот педагогикатын киинин салайааччыта Татьяна Жиркова, СӨ Национальнай библиотекатыттан Туйаара Готовцева, Өрөспүүбүлүкэтээҕи лицей-интернаттан иитэр-үөрэтэр үлэҕэ дириэктэри солбуйааччы Лена Федорова кэллилэр. Нэһилиэк баһылыга Алексей Алексеевич Ушницкай нэһилиэк туһунан, нэһилиэк библиотекара Ксения Николаевна Кириллина  ыытылла турар үлэ-хамнас туһунан билиһиннэрдэ уонна ыҥырыыны ылынан кэлбиттэригэр махталын тиэртэ, инники өттүгэр бииргэ үлэлэһэр туһунан санаатын үллэһиннэ. Кэлбит ыалдьыттар төрөөбүт төрүт тылы харыстыырга, сайыннарыыга улуус үрдүнэн тэрээһиннээх үлэни ыытар инниттэн, хас биирдии нэһилиэккэ ийэ тыл сүппэтин туһугар быһаччы үлэлэһэр түмсүүлэри тэрийэр сыаллаах-соруктаах кэлбиттэр. Онон бүгүн күн устата алаас иһигэр баар нэһилиэктэр тэрилтэлэрин салайааччыларын, общественнай түмсүүлэри кытта көрсөн санаа атастаһан, сүбэ-ама биэрэн, инникитин бииргэ үлэлииргэ сибээһи олохтоон барыахтара